என் கவித்தாத்தாவுக்கு... கடல் கடந்து வாழ்ந்தீர்கள், என் கண்களால் நான் கண்டதில்லை, ஆனாலும் என் நெஞ்சில் உங்கள் அன்புக்கு எல்லையில்லை! என் 'கவித்தாத்தா' நீங்கள், என் வாழ்வின் வழிகாட்டி, தூர தேசத்தில் இருந்தாலும் தொலைபேசியில் அன்பால் உறவாடினீர்கள். "அச்சு நீ வாழ்வில் மாபெரும் வெற்றிபெற வேண்டும்..." அலைபேசியில் ஒலிக்கும் உங்கள் ஆசைக்குரல் இன்னும் என் காதுகளில் கேட்கிறது. நீங்கள் எனக்காகக் கண்ட அந்தச் சிறப்பான கனவுகள், என்றென்றும் என் எதிர்காலப் பயணத்தின் வெளிச்சமாகவே தொடர்கிறது. நேரில் உங்கள் முகம் பார்த்து கரம் பிடிக்க எனக்குக் கொடுத்து வைக்கவில்லை, ஆனாலும் என் மனதின் ஆழத்தில் உங்கள் இடத்திற்கு நிகர் யாருமில்லை. நான் உங்கள் மேல் கொண்ட பாசமும் எல்லையற்ற மரியாதையும், என் இறுதி மூச்சு வரை குறையாமல் நிலைத்திருக்கும். இன்று அமைதியாக உறங்குகிறீர்கள் இயற்கையின் மடியினிலே, உங்கள் குரல் இனி ஒலிக்காது என்றாலும் என் நெஞ்சினிலே வாழ்வீர்கள். நீங்கள் ஆசைப்பட்ட அந்த மாபெரும் வெற்றியை என் வாழ்வில் நான் அடைவேன், என் ஒவ்வொரு வெற்றியையும் உங்கள் நினைவுகளுக்கே சமர்ப்பிப்பேன். போய் வாருங்கள் கவித்தாத்தா... என்றும் கண்ணீருடன் உங்கள் நினைவுகளில், உங்கள் அன்பு அச்சு.