கண்ணா அண்ணா பழகுவதற்கு இனிமையானவர். அவர் பேசும் அழகே தனி ருசி. அவரது பேச்சில் ஒரு நளினம் இருக்கும். அன்பிருக்கும். கண்ணா அண்ணா என்றதும் அளவெட்டி அண்ணா விளையாட்டுக்கழகமும் கும்பிழாவளைப் பிள்ளையார் கோவிலுமே முதலில் நினைவுக்கு வருகின்றன. கண்ணா அண்ணாவின் சகோதரன் மகேன் எங்கள் நண்பர். அளவெட்டி விநாயகர் விளையாட்டுக் கழகத்தின் ஸ்தாபகர். இதை ஸ்தாபிக்கும்போது அவருக்கு வயது பன்னிரெண்டு இருக்கலாம். விநாயகர் கழகம் ஏதோ வடிவில் இன்னும் இயங்கிக்கொண்டிருப்பது ஆச்சரியமானது. கண்ணா அண்ணாவின் வீடு எங்கள் விநாயகர் கழகத்தின் அலுவலகம் போலவும் இயங்கிக்கொண்டிருந்தது. எங்களைப் பார்க்க கண்ணா அண்ணாவுக்கு ஒரு பக்கம் சிரிப்பாக இருந்தாலும் எங்களை அரவணைத்து உற்சாகப்படுத்தினார். எங்கள் ஆண்டு விழாக்களில் ரங்கன் கோஸ்டியும், அடங்காப்பிடாரி நாடகமும் மேடையேறின. கலைஞர்களுக்கு கண்ணா அண்ணாவீட்டில் இரவு விருந்து கொடுத்தோம். சிறாப்பர் அண்ணா கடைக்கு முன்னால் உள்ள பனைவளவே எங்கள் 'மாபெரும்' விளையாட்டுத்திடல். கண்ணா அண்ணாவை பாரிசிலும் சந்திக்கவும் பழகவும் முடிந்தது. இங்கும் ஸ்ரீ மாணிக்கவிநாயகர் ஆலயத்துடன் ஐக்கியமாக இருந்தார். கண்ணா அண்ணா நினைவுகளைக் கிளறியபடி எம்மை விட்டுப்பிரிந்துவிட்டார். ஆழ்ந்த இரங்கல்! Mano