யாழ்ப்பாணம் சங்கரத்தையைப் பிறப்பிடமாகக் கொண்ட ஆசிரியை லக்ஸ்மிகாந்தா ஜீவகன் அவர்களின் மரணச் செய்தி அறிந்து அதிர்ச்சியும் ஆழ்ந்த கவலையும் அடைந்தோம். வட்டுக்கோட்டை யாழ்ப்பாணக் கல்லூரியில் கல்வி கற்று அங்கேயே ஆசிரியையாகப் பணியாற்றிய லக்ஸ்மிகாந்தா ஜீவகன் அவர்கள் நான் கல்வி கற்று பட்டம் பெற்றஅதே கல்லூரியில் என்னைவிட சுமார் 10 ஆண்டுகளுக்குப் பின்னர் மாணவியாகவும் ஆசிரியையாகவும் பணியாற்றியிருக்கிறார். எனது சக ஆசிரியையான திருமதி சுந்தரமூர்த்தி அவர்களுடன் லக்ஸ்மிகாந்தா ஜீவகன் அவர்களைச் சந்தித்து உரையாடியிருக்கிறேன். அந்தச் சந்திப்புக்களின் நினைவு இன்றும் எனது மனதில் நிழலாடுகின்றன. கடந்த 02-05-2019 அன்று லண்டனில் சிவபதமடைந்த எனது தம்பி அருளானந்தகணேஸ் அவர்களின் இறுதிச் சடங்குகளில் கலந்து கொள்வதற்காக அங்கு சென்றிருந்த வேளையில் லக்ஸ்மிகாந்தா அவர்களின் மறைவுச் செய்தியை அறிந்திருந்தபோதிலும் மறுநாள் பாரிஸ் திரும்ப வேண்டிய நிர்ப்பந்த நிலையில் முன்னாள் ஆசிரியையின் இறுதிச் சடங்குகளில் பங்குபெற்று அஞ்சலி செலுத்தும் வாய்ப்பு கிடைக்கவில்லை என்பது மனதை நெருடிக் கொண்டிருக்கிறது. லக்ஸ்மிகாந்தா ஜீவகன் அவர்களின் பிரிவால் துயருறும் பாரிஸ் நகரில் வசிக்கும் எனது கணவரின் நண்பரான அன்னாரின் சகோதரர் ஆறுமுகதாஸ் மற்றும் அவர்களின் உற்றார் உறவினர் நண்பர்களுக்கு எமது ஆறுதலையும் கவலையையும் தெரிவிப்பதோடு அன்னாரின் ஆத்ம சாந்திக்காகவும் இறைவனை வேண்டுகிறோம்.